Torpe Blog No. 1

Pano mo malalaman ang gusto mong malaman kung hindi ka magtatanong? Pano mangyayari ang pangarap mo kung hindi ka gagawa ng paraan? Hindi mo makukuha ang tamang sagot kung hindi sa kanya mismo manggagaling. Maraming tao ang pwedeng magbigay ng opinyon, maraming tao ang pwedeng magsabi sa'yo na gusto ka nya o hindi ka nya gusto. Pano nila nalaman o malalaman? Bakit, sila ba siya? 

Hindi mo ba maintindihan kung ano ang dapat mong gawin? Nahihirapan ka bang magdesisyon na humakbang pasulong? Magsasabi ka na lang ba ng "maghihintay na lang ako ng tamang pagkakataon"? Alam mo ba kung kelan darating ang tamang pagkakataon? Kailan nga ba kasi ang tamang pagkakataon? Ngayon ba, bukas, sa susunod na bukas, sa isang linggo, sa isang buwan, sa isang taon o baka nangyari na kahapon? Pano yan kung nangyari na nga kahapon pero napalagpas mo? Eh di wala na yung pagkakataon na hinihintay mo? Pwede pa kayang maulit yung tamang pagkakataon, pano kung hindi na? Swerte mo kapag naulit pero hindi mo naman pwedeng ibalik dahil tapos na, kaya malamang eh wala ng pag-asa na maging kayo. Kawawa ka naman, iniaasa mo kasi ang lahat sa bukas, pano kung hanggang ngayon ka na lang? 

Kung Ikaw Sila, Saan Ka?

Kung ikaw ay bibigyan ng pagkakataon na maging teacher at magbibigay ng marka sa estudyante. Ikokonsider mo ba ang character, tiyaga, effort at extra curicular activity? Syempre kung ang mga dati o lumang teacher ang iyong tatanungin ay 75% akong sigurado na ikokonsider nga nila ang character sa pagbibigay ng marka. Pero kung ang mga bagong teacher ang tatanungin, 80% akong sigurado na sa performance o exams ng estudyante nila ibabase ang pagmamarka. (Tapos eepal ang school management at magbibigay ng bagong rules sa pagbibigay ng marka.) 

Dalawang teacher na magkaiba, magkaiba ang paniniwala, magkaiba ang paninindigan at magkaiba ang pinagbabasehan. Parehong may punto, pero malaki ang magagawang pagbabago. 

Meron akong kwento: 

Ang bagong teacher, "Hindi kita pwedeng ipasa kung ganyan lang ang iyong performance dahil pagdating sa board exam ikaw din ang mahihirapan at may posibilidad pa na ikaw ay bumagsak. Para sayo rin ang ginagawa ko dahil kung ibabagsak kita ngayon ay malalaman mo na kulang pa ang iyong kaalaman at para maisip mo rin na habang maaga ay kailangan mo pang mag-aral ng mabuti." 
Ang estudyante, "Sige po, salamat sa concern, pagsisikapan ko pong makapasa sa inyong subject sa susunod na semester." 

Bakit Mo Ko Mahal?

Kapag ba mabango ibig sabihin eh madalas maligo at kapag mabaho eh hindi na naliligo? Bilang tao, madali tayong nalilinlang ng ating mga pandama. Mata, ilong, tenga, dila at pakiramdam. 

Minsan: 
Akala mo meron kang nakita pero wala. 
Akala mo meron kang nadinig pero wala. 
Akala mo tama yung naamoy mo pero mali. 
Akala mo tama yung nalasahan mo pero mali. 
Akala mo yun yung nararamdaman mo pero hindi. 

Parang love, akala mo mahal mo na ang isang tao pero ang totoo hindi talaga. Magkaiba yung gusto mo siyang kasama dahil masaya ka kesa gusto mo siyang kasama dahil mahal mo siya. 

Magkaiba ang awa at pagmamahal. Hindi mo naman pwedeng sabihin na mahal kita kasi naaawa ako sayo. (di daw pwedeng sabihin eh nasabi naman.) Pwede mo ngang sabihin pero sa palagay mo tatanggapin ba yan ng pagsasabihan mo? 

Minsan may nagtanong saken kung bakit ko daw siya mahal, syempre gusto kong magpaimpress kaya pilit akong naghanap ng sagot. Andiyang sinabi ko sa kanya na mahal ko siya dahil masaya ko kapag kasama ko siya. Sinabi ko din na kaya kita mahal dahil nauunawaan nya ako kung ano at sino ako. Sinabi ko din na kaya ko siya mahal dahil mabait siya at maalalahanin sa akin. Sinabi ko din na kaya ko siya mahal ay dahil hindi ko kayang mabuhay at hindi ako makukumpleto kailanman kapag wala siya sa piling ko. (kita mo na? Ang galing mambola noh?)